Cân yn ofer
Er tywys y mab i'r Aber a sôn
am swyn yr hen amser,
mi wn yng ngwaelod fy mêr
nad wyf ond cennad ofer.
Hen Albwm Lluniau
Hanesion i’w hanwesu yw ei ddail,
mae ddoe wedi’i drefnu
yn dal rhwng y gwyn a’r du
lawenydd heb felynu.
Trannoeth
Drwy’r mudandod defodol, yn y bwlch
lle bu’r geiriau ysol
yn duo’r hwyr a throi’r drol,
mae ‘sori’n’ wawr amserol.
Gwyn Thomas
Drwy’r bwlch rhwng brodir a byd yr aethost
â’r iaith i chdi’n gerbyd
a chael ym mhob dychwelyd
dragwyddol heol o hyd.
Mi wn am dŷ...
Yn nhŷ Coz mae gwreichion cân, a rhai’n hel
o’r nos gylch y pentan,
y mae awch i’r siarad mân
ond t’wyllwch oer tu allan.